香港中文大學校園是一座翠綠山城，管理樹木的人員功不可沒。獲長期服務獎的中大物業管理園藝組組長盧家強，入職15年，由管理魚池到校園的一草一木，他也一絲不苟，務求做到「最靚最整齊」。他最痛心是校內的沉香樹被砍，「真係為啲樹感到好氣憤」。
長年累月的戶外工作，盧已曬得一身黝黑的膚色，「我真係比入嚟中大前黑咗好多，不過做戶外工作係咁㗎啦，我係男人唔計較呢啲嘢」。盧雖不重視自己外表，但對中大校園面貌卻不會馬虎，「我每日都會巡視管理嘅範圍，確保外觀整齊」。他表示，校內樹木多，每到颱風季節時，都要準備防風，預先修剪樹木，「打風時就冇咁容易冧樹」。他又指，中大十分着重樹木保育，甚至為了一株超過60年樹齡的樟樹而修改原有圖則，「好似神學樓想加建平台，但因為樹木已扎根於泥土，在遷移上好困難，最終選擇放棄加建呢嗰平台，繼續保留樟樹」。
遭蜜蜂螫險命危
他提到，校內的沉香樹被砍令他感到心痛。沉香樹具藥用價值，成為不少不法之徒的目標，「佢哋砍到一忽忽，根本就救唔番，最後都係枯死咗」。他無奈指，只好重新在山上和校園內栽種沉香樹來補救，「被人再偷都無計，唔通真係裝一個閉路電視去睇住咩?」
戶外工作不單日曬雨淋，昆蟲也是他們經常面對的大敵。盧記得，有次修剪草叢時，被蜜蜂刺傷頭部，「我去到保健處打抗敏針時，醫生就話我對蜜蜂敏感，如果我唔打就可能有生命危險」。他往後修草更謹慎，「搵嘢拍吓草叢，確保冇蜜蜂先做嘢」。
即使有機會面對生命危險，但他仍熱愛工作，更獲校方資助修讀樹藝課程。盧笑言，最開心是能夠學以致用，「入嚟之前無諗過做嘢都可以讀番書，學到好多新知識之餘，又用得番出嚟，呢個係我最大滿足感」。
■記者李思潁