近年純素主義大行其道，即使唔係素食者，亦願意保護動物嘅生存權利。而近日網上瘋傳嘅一條短片，就令唔少人更加細心反思，究竟乜嘢先有生存嘅權力？有網民近日上載一條煮龍蝦嘅片，片中可見瀕臨死亡邊緣嘅龍蝦，緊緊箝實鍋邊，而喺佢下方嘅鍋內就係一堆被烹熟嘅同伴。其實呢條片只有短短10秒，但已經好有驚恐感覺，因為隻龍蝦不停咁震動，睇片嘅人都好肉緊，佢稍一不慎就會同其他同伴一樣一鑊熟。
短片上載一日已經有200幾次轉載同分享，雖則有人覺得龍蝦掙扎求存都幾惹笑，但更多人就不值上載者嘅行為，認為龍蝦都有生命，唔可以咁玩弄，有網民直言，「既然要食，不如快快手手，做咩要咁……」亦有話呀，就算唔係素食者，都要有同理心同惻隱心，希望大家識得尊重生命。