為搶攻年輕人市場，特區政府今日會宣佈一個名為「與司局長同行」計劃，畀中四、五嘅同學做司局長嘅「跟班」，喺7月至8月跟住司局長工作，近距離了解高官工作同政府運作，但佢哋只可以做得嗰一日跟班，似乎姿勢多於實際？
政務司長張建宗喺網誌話，全體司局長都會參與計劃，同學生分享個人、學習、職業生涯體驗，今日起至5月11日接受報名。張建宗話參加者要有上進心、對公共服務有興趣，具分析以及溝通技巧，並獲學校推薦。政府做事向來安全系數高，預計政府一定洗好太平地，先畀班年輕人「體驗」，或者篩選乖仔乖女畀司局長，以免尷尬。
張又話，會將青年委員會自薦計劃恒常化，擴展至更多委員會，預料每年有兩次招募，下一輪將於今年6月開始接受申請。涉及嘅委員會有10個，包括土地發展、運輸、環保事務、社會福利、體育及教育等。