立法會粵港澳大灣區考察團噚日到最後一日，點估到上午去到廣州嘅億航智能技術公司，視察呢間公司嘅無人駕駛飛機同航拍技術發展，竟然成為「重」頭戲。點解？皆因「重量級」議員、有成250磅嘅經民聯張華峰成為亮點。
事緣肥老闆到訪上述公司時，嘗試擠入空間極窄嘅單人無人駕駛機，雖然連轉身都有啲難度，但都算成功完成任務，難怪企喺旁邊剝花生嘅議員不斷讚好，民主黨主席胡志偉仲笑笑口話，若連肥老闆坐上去都無問題，部飛行器真係好掂。
呢款單人飛行器機身雖然細小，機艙長約2米、闊約1米，4個軸上有8個螺旋槳，但承載重量都達100公斤，每部盛惠20萬美金。該公司代表向傳媒指，杜拜政府早前計劃引入飛行器做交通工具㖭。