立法會將會喺下星期一宴請中聯辦主任王志民，有意出席午宴嘅新民主同盟議員范國威就喺佢嘅fb專頁post咗一張水墨畫（圖），原來係預備當日送畀王志民「贈興」，佢又呼籲網民集思廣益，一齊創作題字，鞭韃王志民惡行。
咖喱范帖文就話，贈畫係因為不滿中聯辦干預香港內部事務，王更加發表「中環西環行埋一齊」之類嘅言。佢幅畫總共畫咗3個人物，分別係已故中共領導人鄧小平、特首林鄭月娥同埋王志民。佢話，畫作係反映林鄭同王志民違反之前鄧小平所作出五十年不變嘅承諾，林鄭眼神閃縮，更凸顯佢同王志民「行埋」嘅醜惡。
咖喱范就呼籲市民留言，建議題字內容，而佢自己亦有多個想法，包括題字「昨天講一套，今天做一套」、「昨天信誓旦旦，今天背信棄義」等。八方問過咖喱范，佢話今次係佢首次出席同類午宴，希望到時王志民會回應。