立法會相當清靜，梗係啦，一半議員都走咗去大灣區考察吖嘛。今次大灣區考察團有32位議員，當中９位係民主派。唔知係咪吸取上次嘅教訓，擔心俾人入侵手機，幾位去大灣區嘅民主派議員，噚日佢哋嘅fb相當靜局，反而建制派同埋問責局長就冇有怕，照上fb可也。
話說上次立法會組團返內地睇東江水後，有民主派議員部手提電話就被懷疑中招，被人入侵。見過鬼仲唔怕黑咩？所以今次去大灣區嘅幾位民主派都有備無患，唔用平時嘅電話號碼，返到上去又唔用fb。
莫乃光：進入Twilight Zone
好似專業議政莫乃光就係出發前宣佈，佢即將進入「Twilight Zone（迷離境界）」，所以唔會用平時個號碼，而民主黨黃碧雲亦都係咁，噚朝佢出發前喺fb講低，話明呢3日都接唔到電話。都啱嘅，入去「迷離境界」係要小心啲，不過政制局長聶德權、經民聯張華峰就一於少理。佢哋兩個參觀深圳市交警智能交通指揮中心嘅時候相當雀躍，尤其是對嗰位女警……旁邊嗰部電單車，影咗大合照都唔夠，仲要單獨影番張擺上fb，話時話，聶局長坐電單車都幾型。
李八方