民主黨黃碧雲同民建聯何俊賢噚日喺立法會大聲嘈交，驚動唔少路人甲。
原來黃碧雲因政府唔就公營骨灰龕位設年限嘅建議諮詢市民，去信要求喺立法會食物安全及環境衞生事務委員會舉行公聽會，點知委員會主席何俊賢唔肯開，只畀公眾透過書面表達意見。黃碧雲覺得好好離譜，結果今朝同何俊賢喺走廊就公聽會安排爭拗近10分鐘，其後喺財委會特別會議有關食物安全及環境衞生環節公開批評何俊賢，話對方因為冇房、冇時間等原因唔會搞公聽會。
捉實食環署長狂呻
何俊賢席間反駁指2月開會時冇議員話要開公聽會，黃碧雲喺第二次會議先提出，自己充份考慮各方理據同訴求，暫時決定先畀巿民用書面方式表達意見，批評黃碧雲抹黑，並指黃碧雲大爆佢哋會後嘅私人對話唔道德。而黃碧雲完會後餘怒未消，喺走廊遇到食環署署長劉利群時亦捉住署長狂呻，不滿政府唔肯公開諮詢，劉利群會唔會覺得無辜辜中招？