一般的士分為5座位同4座位，5座位的士前座理論上可坐兩人，但通常只坐1人，後座坐4人感覺幾窄。近日網上則流傳一段短片，一班學生哥急急腳上咗架4座位的士，越上越多，最終上咗6人，明顯超載，結果兩名學生無奈落車。
1個改上前座 2人焗住落
網民Dennis Ho日前喺「馬路的事討論區」上載一段約2分鐘短片，形容「𠵱家係歡樂滿東華時間，我哋一齊睇吓一部紅跑究竟可以載到幾多個中學生呢？」片段本周一下午喺筲箕灣望隆街、工廠街交界拍攝，一班相信係筲箕灣東官立中學嘅學生截停的士，快速上車，各人似乎都唔願坐前座，1名學生喺左邊後門成功上車，5名學生喺司機一邊嘅後門上車，但其中1人似乎眼見塞唔落，轉到另一邊開前座車門上車，6人成功塞入車廂！但幾秒後，最後上車的兩人慢慢落車，咁梗係啦，如果超載點算好？
識睇睇留言
關菊妍：車費多啲人分抵啲。
神級廢青：人哋日日坐㗎啦，咁啱呢架唔載之嘛，學的士業界話齋呢啲只係少數，平時九成都會載。
陳李張：如果可以咁做，香港交通擠塞情況會改善。
資料來源：《蘋果》網頁