威爾斯親王醫院上周遺失逾百份病人醫療紀錄送遞通知書，好在當晚接載失魂文員嘅的士司機楊益光同接更司機林奕豪其後主動送回文件。新界東醫院聯網總監羅思偉同護理總經理何沛儀噚日同兩的士哥見面兼送紀念品表揚佢哋路不拾遺。
職員留低醫院文件
威院引述楊益光話上周四晚喺威院附近接載一乘客，下位乘客上車時話佢知後座有個環保袋，佢就將環保袋放喺車上儲物位置稍後處理；至周六朝早喺報章得知有人喺的士遺留醫院文件，時、地都同佢曾接載嘅乘客脗合，所以聯絡威院核實，林奕豪接到通知後知道文件對醫院好重要，就揸車送回。
原來楊益光有35年揸的士經驗，認為表面冇價值嘅物品，對物主可能非常重要，所以對乘客失物唔會掉以輕心。林奕豪就建議乘客保留的士收費收據，因收據有車牌號碼，可增加搵返失物嘅機會。