冇英文名代表咩？原來代表愛國！相信全國政協副主席、前特首梁振英係咁諗！梁振英噚日出席出席論壇致辭時話喎，冇為3名子女改英文名，而外國人叫佢哋中文名都叫得好準、好親切，同時話佢哋都冇攞外國護照，「因為我相信他們的未來，他們的未來不必有英文名字，更不要外國護照」。
疑寸Carrie同囝囝
明明3名子女都喺外國留學，偏偏CY都要藉此表現好愛國，莫非係想寸爆現任特首林鄭月娥？皆因林鄭英文名Carrie，兩名囝囝節思同約希，透過居英權計劃攞到英籍喎。
梁振英嘅致辭真係幾肉麻，佢話自己生於1954年嘅甲午，雖然唔係1894年嘅甲午，但對甲午海戰同戰敗嘅後果感同身受，又指英國留學時成日同其他香港同學通宵達旦談國家同香港嘅未來，畢業返港又經常到內地講課，聲稱70年代曾喺一個白瓷人像底座寫上「放手大幹 四化有期 富強在望」，聲言係24歲年輕人對國家未來嘅盼望。
佢繼而話覺得現今嘅年輕人比佢哋嘅一代有更大更好嘅舞台，「這個舞台就叫中國」，又話自己3個子女係25至29歲，「他們的時代就是國家從小康奔向富強，他們的未來就是為中華民族復興奮鬥的三十年。傳昕、齊昕、頌昕三兄妹名字裏面都有一個昕字，寓意希望，希望就是對未來的預期，我預期他們一代的未來充滿希望」，希望大家聽到呢度唔會覺得唔舒服……
李八方