有傳被DQ嘅九西前議員劉小麗即將撤銷司法覆核申請，意味九西立法會議席即將進行補選。上次建制派喺九西成功取得零的突破，雖然部份原因可能係贏在民主派姚松炎嘅選舉策略有問題，但結果都有啟示，似乎樣貌四正嘅「中間派」可以代表建制派殺出重圍，所以有意游說「中間派」人士出選。但究竟係邊個地位咁高咁把炮？八方聽聞係有「民望高」稱號嘅食物及衞生局前局長高永文。
建制派一直流傳，話九西補選嘅真命天子既唔係梁美芬愛將梁文廣、亦唔係蠢蠢欲動嘅自由黨李梓敬，反而係近日少有露面嘅高永文，貪佢形象健康、政治味亦唔算濃，再加上係阿爺極寵信，最新仲獲任為全國政協委員。之不過呢，暫時似乎都只係建制派單方面想游說出戰，有指民望高至今冇明確答覆。
至於同樣被DQ嘅長毛，暫時傾向繼續上訴，舉行補選嘅機會相對較細，所以建制派都靜觀其變，暫時未有特別動靜。