拜仁距離三冠王又近一步，德甲已經「食出」封王、歐聯殺入四強、啱啱周二德國盃屠殺對手入決賽叫糊。「宇宙仁」出戰德國盃四強，作客近期狀態勇銳嘅利華古遜，但係賽果一樣一面倒。靠湯馬士梅拿上演帽子戲法，最終以6:2大勝，昂然殺入德國盃決賽。
今場比賽拜仁只係用咗三分鐘就領先，查維馬天尼斯禁區頂起腳射門，喺禁區嘅羅拔利雲度夫斯基加一腳改變方向，為球隊先開紀錄。六分鐘後，呢位波蘭射手接應列貝利左路傳中，伏兵遠柱射成2:0。雖然之後利華有拿斯賓達頭槌破蛋，但下半場就到湯馬士梅拿大發神威，佢分別喺52分鐘、64分鐘，同埋78分鐘取得士哥，加埋堤亞高艾簡達拿亦整一粒，埋單以6:2大炒有里安拜尼射入靚絕罰球嘅利華古遜。
2R續約交出助攻
今場比賽拜仁幾乎派出最強陣容迎戰，而最近完成續約嘅兩老列貝利同洛賓嘅表現依舊犀利，今場兩老都交出助攻，其中堤亞高艾簡達拿所入一球，就係兩老一次精采配合，列貝利左路引球面對四個利華守將夾擊，仍然可以交畀後上嘅洛賓，令後者助攻堤亞高艾簡達拿入波。而洛賓面對足足比自己細近15年嘅守將列素斯，依然冇有怕，更令到對方上半場初段被罰黃牌，半場仲俾教練靴列治換咗出嚟。
希帥五年前食過三冠
現時呢支「宇宙仁」，令唔少球迷諗番起12/13球季都係由希歷基斯帶領嘅拜仁，最終成功贏得三冠。賽後呢位老帥都大讚球隊表現，話球員充滿經驗，不停創造入球機會。今場戴帽嘅湯馬士梅拿就話，成支拜仁都向住三冠王呢個目標進發，而佢自己都覺得將會有啲嘢發生。的確，德國盃決賽無論係史浩克04或者法蘭克福都唔會阻得住拜仁，所以，三冠路上最大嘅阻力，必定係歐聯四強面對皇馬，但正如《慕尼黑日報》所言：「德甲六連冠距離三冠王頭銜，只係剩低四場比賽。」