2008年四川汶川大地震後，各界捐助一呼百應，立會財委會亦通過撥款約100億成立基金，喺四川資助逾190個項目協助災後重建。而當年負責特區援建災區工作重任，落在時任發展局局長林鄭月娥身上，佢曾經同義工同工程人員去過災區視察，就算其後官至政務司司長，對汶川嘅災後重建依舊好上心。
八方聽聞，10年後升呢為特首嘅林鄭，今年5月中會到汶川出席大地震10周年紀念活動，同行嘅仲有部份官員同行會成員。而林鄭對上一次訪問汶川就喺2016年5月，佢當時喺四川卧龍自然保護區主動抱抱熊貓嘅相（圖），固然令人印象深刻，但更重要可能係當年佢同隨團傳媒高層茶敍上一席話，據報道佢席間批評現屆政府不足，又大談施政意見，被視為鋪路選特首，結果兩年後真係做咗特區一姐喎，唔知今次會唔會趁機又發表心聲？