鹿島鹿角同名古屋鯨魚兩支老牌球隊喺上周六嘅日職互撼，結果主場嘅鹿島憑金崎夢生上下半場各入一球贏2:0，一洗頹風。兩隊近期表現都幾差，鹿島聯賽三戰不勝、而升班馬名古屋更係聯賽四連敗。鹿島有今季回流日職嘅靚仔球星內田篤人首次正選上陣，開賽10分鐘就由金崎夢生接應傳中射入先開紀錄。到完場前兩分鐘，佢再喺對方後半場鏟甩對手腳下球後接應隊友直線，單刀射入成2:0完場。