巴士車長經常遭躁客辱罵、不停受氣，真係冇諗到，除咗車廂，站頭休息地都成為靶場！網上近日瘋傳一條短片，一名阿伯喺藍田匯景巴士總站嘅九巴員工專用洗手間如廁，車長入內要求阿伯離開，阿伯卻不停粗口橫飛，先鬧車長「垃圾」、「有咩資格講嘢呀」，繼而又話「九巴公司執笠啦冚家X」，但又自稱「唔急尿㗎」（咁唔急又點解要霸住個廁所呢……）。
大罵「係狗X專用」
片段可見車長即時指向門上告示牌話「九巴員工專用」，惟「員工」兩字被貼紙遮蓋。點知阿伯離開洗手間時仲熄埋燈，車長就話「喂，唔好熄燈啦師兄用緊呀」，阿伯就大鬧「唔X使用啦，垃圾嚟㗎」，其後情緒失控不停以粗口辱罵車長，車長就勸對方冷靜話「係員工專用㗎」，阿伯隨即大罵「係狗X專用，唔係九巴專用」，車長無奈話：「啱呀狗X專用，（你）入去用吖嘛。」
有車長話呀，公司規定員工廁所因保險問題不外借，但就有市民當公廁自出自入。唔少網民認為阿伯野蠻，讚車長EQ高，有人建議九巴喺員工廁所安裝拍卡門鎖，防止同類事件發生。
識睇睇留言
Candy Chan：既然是專用！上鎖咪得囉！街外人咪入不到去了！
SP Chan：大大方方開口問一句，我相信一定會借！
Chris Au：唉，借個廁所用箒，使死咩！予人方便，也是功德之事。
張寶强：人哋都話保險問題，非員工喺嗰個廁所受傷，到時保險公司唔賠！唔通狗巴賠咩？
Ck Wong：恃老賣老！
資料來源：《蘋果》網站