前港區人大代表吳康民噚日精神奕奕出席生日Party慶祝92歲生日。到賀者眾一啲唔奇，例如佢徒弟、立法會前主席曾鈺成，笑晒口到場；身兼全國政協副主席嘅前特首董建華，以及福建幫元老如楊孫西同盧文端等亦有賀壽。
但芸芸人士中，一男子卻好搶鏡，除咗青靚白淨，睇真啲，原來係Janice Man嘅金融才俊男友吳啟楠（Carl）。唔通阿Carl同康民叔有親？無錯，確實係有親，皆因佢哋係親戚，康民叔就係佢大伯！
阿Carl係新風天域首席執行官兼聯合創始人，即係前財爺梁錦松嘅拍檔，而同樣到場賀壽嘅政制局前局長、港區人大代表譚志源，則係新風天域集團醫療副主席喎！難得喺非工作場合相遇，兩人孖住同康民叔合照，祝福壽星公福如東海，壽比南山。