香港江蘇社團總會下周五（20日）喺維園一連三日搞江蘇文化嘉年華，主打江蘇美食、特產同埋文化表演。為咗宣傳可以去到幾盡？全國政協常委兼香港江蘇社團總會主席唐英年噚日就「處男下海」，喺專人侍候下，着住圍裙夥拍同樣來自江蘇嘅鄉里女藝人高海寧（高Ling）齊齊下廚，合力䏰咗兩道江蘇名菜「薺菜糰子」同「菜肉雲吞」畀傳媒試食。
唐唐搓糰子嗰時自嘲幾出名「為食」，「但煮嘢通常都雞手鴨腳，平時都係幫手食多」，仲幫道菜改花名叫「搓圓撳扁」。
大讚高Ling牌雲吞「好靚」
佢話外婆係江蘇人，所以自細就食佢䏰嘅雲吞大，「同出面餐廳整嘅零舍唔同，好飽滿」，形狀好似金元寶咁。對住隔籬嘅美女，唐唐都忍唔住大讚「好靚呀」，嗱嗱嗱，「為食」嘅唐唐係讚緊高Ling包嘅雲吞好靚，咪太多聯想嘞！
食飽當然要傾吓偈，唐唐話個嘉年華花費幾百萬，因為係首年試業，所以畀市民免費入場，旨在宣傳江蘇文化，唔係好識預人數。據聞現場有50幾種江蘇美食提供，唔使畀錢有得食。嘉年華3日嘅開放時間都唔同，4月20日晚上7點開幕後至10點完，21日就朝十晚十，22日就朝早10點開到傍晚6點！
李八方