新任港區人大代表、前海香港事務首席執行官洪為民（Witman）對制服情有獨鍾，志願係做海軍指揮官，中三時學校交通安全隊招募隊員，「套制服真係好靚」，奈何父母反對，估唔到廿零歲機緣巧合下加入交安隊，一做做咗23年位至總監。
俾Legislative Council考起
Witman話10歲由內地來港時確實唔慣，「內地間屋大香港好多」，其後搬去大口環嘅100呎木屋，「電都係偷（用）、水係用山水，有時跟老竇去附近地盤挑水」。佢來港時喺內地跳班讀至中一，由於唔識英文，親戚叫佢喺香港由小五讀起，「竟然要降兩級，我好唔開心」，有日同媽媽見到當時喺西環嘅鐘聲慈善社胡陳金枝中學，外面貼住「招生」，即刻拉阿媽去敲門，校長畀咗三份卷佢做，結果中數俱佳，英文唔掂，但都肯收佢。
廣東話唔好俾同學笑，但Witman好快就同同學混熟，「好多同學每朝會借我啲功課『參考』」。佢亦盡力克服英語障礙，「有科EPA用英文教，第一堂講Legislative Council（立法會），嘩，共產黨國家冇呢樣嘢喎，啲字又唔識解，一頭霧水」，之後每朝起身背30、40個英文字惡補。
中六考入鄧鏡波，香港理工學院又收佢讀數學，由於想早啲搵錢養家，讀咗兩星期中六就入理工，嗰時佢得15歲，係理工最年輕嘅學生。畢業後打過工又創過業，48歲嘅佢亦係中大歷史系文學碩士、英國赫爾大學工商管理碩士等，仲攞過香港十大傑青。