外界流傳被DQ嘅劉小麗即將撤回司法覆核申請，意味九西議席最快今年可能補選。雖然上次民建聯鄭泳舜喺九西爆冷當選，但據聞建制陣營總結賽果都覺得贏在人哋唔團結，所以下次若再派員出戰，如果係政黨新人，都係當練兵多過再下一城，除非……有無黨派嘅中間派肯代建制派出戰啦，八方聽聞建制陣營真係有心儀人選，但未知人哋制唔制咋。
認經民聯有意戰補選
既然未有着落，政黨都要率先部署，據聞經民聯都想推薦深水埗區議員梁文廣見吓大場面，就喺呢個時候，經民聯梁美芬喺啟德德朗邨開設議員辦事處。3.11補選結果可見，啟晴同德朗邨被建制派攻陷，姚松炎輸鄭泳舜逾1,700票，難怪建制派要喺呢區駐重兵。
梁美芬噚日喺辦事處開幕禮致辭時細數經民聯政績，政務司司長張建宗、民政事務局局長劉江華同教育局局長楊潤雄都畀面出席。梁美芬話啟晴、德朗係經民聯好辛苦打番嚟，繼續落戶都好應該。講到補選，佢承認經民聯有意向參選、亦有成員有興趣，但都要同其他黨協調，相信建制會協調一人出戰。