巴塞隆拿上個禮拜六靠美斯連中三元，西甲主場3:1輕取雷加利斯，今季喺西甲繼續保持不敗，追平皇家蘇斯達喺1979至80年創下嘅38場聯賽不敗紀錄，而且今次係美斯效力巴塞期間嘅第40次戴帽，相當誇張。
美斯今場喺27分鐘主射罰球破網幫為巴塞開紀錄，亦都係佢今季聯賽第六次射罰球搞掂，追平咗「細哨」朗拿甸奴06/07球季創下嘅聯賽單季入六個罰球隊史紀錄。而32同87分鐘美斯再入兩球，帶領巴塞贏3:1，今季聯賽31場不敗，跨季更加係38場不敗，追平咗皇蘇保持咗38年嘅西甲最長不敗紀錄，亦都極大機會重奪西甲冠軍。
而美斯效力巴塞以來，今次係第40次連中三元，而家喺聯賽累積入29球，歐洲金靴獎方面追平咗帶頭嘅利物浦翼鋒穆罕默德沙拿。