忙碌嘅香港人都熱愛旅行，影相更係旅途中必備環節，但無論如何都要小心安全。有網民近日喺facebook分享一段影片，影到一批遊客喺台灣合歡山武嶺旅遊時，無視山邊當眼處一面「危險！禁止攀爬」嘅紅色警告牌，跨過柵欄到懸崖邊一處山頭拍照，佢哋除咗講普通話，部份人亦講廣東話，相信係香港旅客，難怪有網民嘆失禮港人。
網民轟影衰港人
影片開首係一男子以「大字形」姿勢企喺山頭，然後由企喺下方、講普通話嘅友人拍照，旁邊仲有幾名遊客等待，輪流爬上山頭。旁邊有疑似港人爬入欄內幫同行友人拍照，更有小孩隨父母爬入欄內大叫「我都要影！」有網民批評片中遊客「影衰晒」港人、「咁大個牌喺度都照爬，真係畀十個叻」。
片中嘅山頭已被當地政府列為禁止攀爬嘅危險區，若闖入嘅旅客失足，後果不堪設想。有網民留言時大吐苦水，話「出去旅行最怕附近有大陸同香港人」，更形容帶小朋友出遊嘅父母是「超級哥斯拉」，批評港客經常「小小事就投訴到失控」，有網民亦稱「有香港人嘅地方就有麻煩」。
識睇睇留言
黃道堯：莫講話在台灣地方不守規矩，就算在香港有好多港人都好垃圾……根本，今天的港人同大陸人無分別！
Hellas Lam：條命係佢哋嘅，佢哋要死唔通唔畀佢死咩！
Andy Ken Chan：老老實實，係香港人定係新港人？
Chris Ma：個景有冇咁靚呀，搵命博！
Harris Parker：拍照拍片share呃like造成那麼多反常舉動！自尋死路。
On Yee Annie Kwok：香港大陸化！
資料來源：《蘋果》網站