中美貿易戰究竟開始咗未？美國分析師認為戰事（battle）一觸即發，但戰爭（War）尚未開始，但所有戰爭都係由小仗打起嘅，譬如開頭係幾排軍人互相開槍，死傷二三十，跟住雙方沉不住氣，出動連、營士兵互轟，然後在最高司令默許下，出動團、師，一發不可收拾，就會兩陣對圓，全軍互劈。
目前貿易戰線方面，先係特朗普向天開幾槍，向中國鋼鐵出口（其實只佔美國市場不足2%）徵收25%關稅，跟住中國宣佈係咁意向美國出口貨徵收同等25%關稅，總額只不過30億美元，數目細到極，以示還擊之意。
然後特朗普政府在4月4日香港時間凌晨宣佈向1300中國產品徵關稅25%，總額五百億美元。香港股民在4月4日上午仲未知死，以為無事，大家拋浪頭啫，點知4月4日下午來到，中國立即宣佈同等力度還擊，港股於是午飯後開市即跌，愈跌愈多，收市時跌咗661點，形成每一次股市震盪都係大跌、小反彈嘅格局，走勢一浪低於一浪，若果跌破二萬九千點，走勢就認真唔盞。
老友獅子王話，世人以為特朗普係生意佬，鍾意開天殺價，落地還錢，要以鋼鐵關稅為藉口，以關稅對付中國，最終都係要攞彩離場嘅啫，獅子王講特朗普呢次好可能唔係講錢，而係講長期戰略，誓保美國之世界一哥地位，不容中國在共產主義主導下，挑戰美國超級強國地位。如果這是真的，世界股市有排擔驚受怕，保守股民還是增持現金、黃金為妙。
對上一次美國感到受共產主義威脅，全力對抗嘅就係1957年10月4日，蘇聯發射世界第一枚人造衞星，令美國大受震動，其後全力動員科學界追趕蘇聯，與蘇聯展開一場長達30餘年的太空科技及軍備競賽，蘇聯共產政權於1989年開始解體，與經濟資源消耗於太多軍備上，導致民生經濟低迷，不無關係。
現在中國取代蘇聯，不用蘇式集體主義，改以鄧小平開展的國家資本主義模式，配合中國人是天生資本家的民族性，凡事向錢看，已成為世界第二大經濟體，加上中國人口多，民族性係唯有讀書高，科技精英不缺，在最新資訊電腦技術上，已可與美國一爭。特朗普視2018年的中國為1957年的蘇聯不足為奇，這次美國的關稅清單特別針對中國科技產品，企圖未開始先打壓（pre-empt）「中國製造2025」的大計，顯示這場貿易戰不是短期生意談判，而是長期發展策略對決！戊戌年是凶險年，不可輕視。