日本女星渡邊直美以搞笑形象深受歡迎，近年仲成功衝出亞洲，紅到海外，連英美傳媒都有報道佢嘅消息，而服裝品牌GAP都搵渡邊直美任代言人，拍住美國樂壇新貴SZA、大熱美劇《漢娜的遺言》（13 Reasons Why）嘅上位男星Miles Heizer等一齊跳舞拍廣告，十分威水。
近年，渡邊直美更封當地IG女神，以792萬追隨者拋離一眾日本紅星。渡邊直美勝在夠親民，以親切形象狂吸支持者，去咗鹿兒島嘅佢就透過IG嘅story公開行蹤，上載同好友於居酒屋嘅醉酒狂歡短片，並打卡透露身在天文館吾愛人本店，點知當佢哋離去時，發現店外擠滿大批支持者，現場數十人以女粉絲居多，人群跟住渡邊直美行到商店街，場面相當墟冚，而渡邊直美亦冇托手踭，為粉絲逐一簽名及任影唔嬲，佢仲毫無架子在IG多謝大家專登嚟見佢，抵佢咁襟撈。