愛國除咗唱國歌、反港獨，下一步可能係着古裝。全國政協副主席兼前特首梁振英前日一身闊袍大袖古裝漢服，出席夫子會喺尖沙嘴文化中心廣場舉辦嘅華服節開幕禮，唔知係咪曲線支持領導人復古，恢復帝制？
話大時大節要着華服
古裝689致辭時話，「正裝唔一定要西裝加領帶，今日世界各地嘅重大活動，參加者都會着本國嘅傳統服飾，所以佢好支持推廣華服，重大嘅中華節日要着華服」，聽完佢咁樣講，第時訂立華服法強制港人正式場合着古裝都唔出奇。
佢又話華夏服飾嘅歷史充份體現咗中華文化包容、兼收並蓄嘅特質，好似唐朝對外開放，原本闊袍大袖嘅漢服受中亞等地區風尚影響，時髦女性開始着窄袖衣衫，仲十分流行披搭波斯式樣披肩，就等如𠵱家「一帶一路」國際合作一樣。講華服都可以扯到去一帶一路，又點到你唔服。
至於舉辦單位夫子會，知名度唔高，網址亦只話宗旨係推廣中華傳統文化，好似同政治完全無關。但夫子會嘅主席黎展康就係較早前通過青年自薦計劃，獲政府委任為公民教育委員會新成員，可知呢個會來頭應該唔簡單。
李八方