星期日紅假都要開會，立法會議員真係多得一地兩檢安排唔少。立法會《廣深港高鐵（一地兩檢）條例草案》委員會噚日加開會議，唔少泛民議員繼續追問有關期限、費用、租賃、實際安排等問題。
葉劉護住陳帆
公民黨郭家麒席間直斥政府就有關問題「口爽爽」、「左閃右避」，運房局局長陳帆理得你咁多，只係回應「適時會公佈」，郭家麒不滿繼續狙擊，但陳帆都只係話對方問題與草案無關，引來郭大鬧「你不如唔使嚟講」。
委員會主席葉劉淑儀見狀就向郭家麒講，「你嚴刑拷打佢都冇用」，郭隨即話：「咁你（葉劉）拷打佢（陳帆），如果唔係我拷打你啦。」坐喺郭身旁嘅毛孟靜即係大叫「主席鼓吹暴力」，葉劉其後冷笑回應：「好暴力，真係越嚟越暴力。」講真吖，霸王硬上弓過草案，又點會唔暴力？