揸車撞倒人，司機通常會落車睇睇，但如果撞到動物，無良司機可能會扮睇唔到甚至不顧而去，但總有司機充滿愛，日前一隻哥基突然出現喺馬路中心，幾名司機不但冇無視呢位「不速之客」，仲合力自製路障助哥基逃離馬路脫險。唔少網民大讚司機有愛心，感激佢哋救咗狗狗一命。
狗狗越追越走
網民Manchii Chan早前喺facebook群組「貼地狗狗鎮」轉載一段車cam片段，片段顯示司機喺觀塘繞道往東隧口落斜路段時，發現左邊慢線有一架黑色車打死火燈停低，車旁突然有隻哥基走出嚟，司機立即煞車，輾轉間封住兩條行車線，形成一個自製路障。之後再多一名電單車司機加入拯救行動，哥基初時有啲驚，閃避一輪後，電單車司機最終抱起哥基。
轉載嘅網民話片中嘅狗狗已經被帶去掃晶片。唔少網民留言感激司機「腳下留情」，愛護一條寶貴生命，又希望狗狗唔係被主人遺棄。亦有網民話如果呢隻狗唔係名種狗而係唐狗，情況可能會唔同，感嘆唐狗遇有同樣情況時可獲司機拯救就好嘞。
識睇睇留言
Christin Lee：小哥基真幸運，在鄰國一早變柿餅了。
Ho Olo：希望對咩類型嘅狗都可以得到呢一種尊重。
Patky Fu：感謝熱心車主！
COnnie TSe：這班司機該受讚賞。
Jackson Chan：不鼓勵，因為咁樣會發生交通意外。
資料來源：《蘋果》網站