同一陣營，唔一定有面畀！前排八方講過，星島集團旗下嘅「巴士的報」解構咗佢哋老闆、即係何柱國點解喺公開場合向董建華開拖，原來因為老董搞智庫又搞網媒「香港頭條」，令炒何大動肝火！
查實各有各做唔得咩？有時可能因為「唔怕生壞命，最怕改壞名」。阿董個網媒即使人氣唔高，弊在個名同炒何嘅《頭條日報》極相似，「巴士的報」噚日又喺專欄文章爆料，話炒何發火後，阿董嘅「香港頭條」已靜靜雞改名成「點知天下」。
巴士的報：好過唔做嘢
雖然阿董讓咗步，但似乎未平息到炒何嘅怒火，事關「巴士的報」引述高人話喎，阿董肯改名只係「好過唔做嘢」，但「更好的是不要再搞媒體」，理由係阿董嘅智庫靠籌錢而運作，籌錢即係人哋嘅錢，搞媒體就係「偏離本業」喎！明明阿董係政協副主席、位屬國家領導人級別，而炒何只係政協常委……似乎真正嘅影響力，同各人喺國家嘅位置，未必成正比。