這天(30日)耶穌受難節公眾假期，沙田馬場晨課較淡靜，但當然亦有部份騎練仍積極備戰，盡露搏殺決心，其中就包括較史卓豐、蘇偉賢呢pair組合。
話說史卓豐今早替下周一(4月2日)沙田第四場四班1200米草地賽的「承你所願」在泥地快跳三段，操前史卓豐先摸摸馬頭然後才上馬，洋溢對此駒鍾愛之情。而廐主蘇偉賢亦在操練前後傍到實，尤其「承你所願」跳完，馬兒已返倉，但蘇偉賢仍捉住史卓豐傾個不停，指手畫腳講解陣上戰略要求，似乎對今戰充滿期望，有晒搏殺手影。
「承你所願」是實惠家居（Pricerite）老闆關百豪名下愛駒，上季三歲三戰兩勝，潛質不用懷疑，今季雖表現下滑，但一來評分已減不少，二來上仗拼後操練工夫明顯加強，復課由史卓豐試兩課大閘，其中一課後上有勁勝出，加上今早的動態，看來「承你所願」隨時可重開勝門。