繼「陪住張曉明睇櫻花好浪漫」的強國腔幸福對白後，湯渣又有新猷，今次叫香港政府趕快為23條自行立法，否則「可能去到北京代你立法」。
問石硤尾那批被基哥宣稱「當佢子姪看待所以只會投佢，唔會投唔識嘅姚松炎一票」的老人家，明唔明湯渣講乜？到底係恐嚇？震懾？吹牛？五毛？拉票？抑或等同羅范金句：「政府真係嚟真」？
這個政府，是指習帝永續下的北京政府，北京代立23條，全票三千舉手通過，零反對，零棄權。23條這個維他牛，老奉老翻，明刀明槍，幫港23，送你歸西！
只消開了「代客泊車」的頭，車主從此唔使扭N手軚泊S位，咪以為好爽，久而久之，等於白癡！北京如湯渣所言，代港立法，被親共派操弄的立法會，以後慳啲！立法會武功由半廢過渡到全殘，壽終正寢！官員上京交差，行埋西環交數，睬市民都傻。香港由主，淪為客；作客，輸幾多球呢？可以想像，代你射龍（佢搬龍門），代你上床（射你落海），代你擦鞋（份糧兼四千蚊都入佢袋）。一切從代港立法開始，維他牛的23條一過，無人會代你坐監！所以，湯渣溫馨提示，還是自己立23條，自己踎23年吧！喔，被姦與自宮，問湯渣，兩者有差嗎？