人有相似，俾人認錯時，點反應至好？白鴿黨前晚舉行創黨23周年晚宴，除咗特首林鄭月娥破天荒現身兼捐錢搶晒鏡，現場唔少白鴿黨年輕靚女亦相當吸睛。其中獲力捧嘅新星、已故立法局議員吳明欽嘅千金大狀吳思諾，竟然驚爆疑似有個孖生姐妹，喺現場世紀重逢？
事緣有白鴿黨「大長今」之稱嘅靚女沙田區議員曾素麗，前晚出席晚宴時，不斷有人同佢講，識得佢爸爸？亦有人問佢，係咪姓吳喎？搞到佢都一頭霧水，要喺面書留言寫番句「黑人問號.jpg」。
之後佢有個開心大發現，原來唔少人係認錯佢係吳思諾，乜真係咁似樣咩？當然搵埋「失散姊妹」selfie，然後喺facebook上載咗兩人合照（圖），等公眾評吓佢哋係咪好似樣？結果當然係唔少網民留言話真係好似。