周六意甲榜首嘅祖雲達斯作客只能同深受降班威脅嘅史帕爾（圖）打和0:0，雖然意甲12連勝告一段落，不過球隊已經10場意甲不失，追平咗自己15/16球季所創嘅紀錄。兩隊上半場加埋都係得一個射門中框，下半場祖記加壓，不過依舊破門乏力，除咗係上年12月9日之後首次意甲失分，亦喺球隊自從九月作客魯營0:3不敵巴塞隆拿後，各項賽事第一次入唔到波。唔知係咪因為不滿球隊表現，教練艾基利仲畀傳媒發現到未吹完場雞，就嬲爆爆咁入咗更衣室。另外，國際米蘭周日意甲就有莫路伊卡迪學足英超嘅穆罕默德沙拿，上演大四喜助球隊作客大炒森多利亞5:0，而佢個人亦喺意甲嘅入球增添至102個。