全國政協會議噚日閉幕，政務司前司長唐英年日前雖順利冧莊做常委，但今年北京兩會對唐唐嚟講，肯定別有一番滋味在心頭，皆因父親唐翔千期間過身，唐唐為咗國家畀佢嘅開會任務，遺憾未能見父親一面。而喺今次兩會，據聞唐唐都交咗唔少功課，提案多達6項，涵蓋青年，文化，金融同大灣區等議題。
其中有關文化發展嘅兩項提案，分別係《利用文化平台伸延國家優勢》以及《利用文化發展培育年青人》，大家都知啦，唐唐做咗西九管理局主席，故宮博物館佢都要負責，佢建議有180萬件收藏品嘅北京故宮博物館，全力支持香港故宮博物館嘅藏品展出，等國家利用香港作為對外平台，弘揚中華文化，兼sell至海外，唔知中央政府buy唔buy？