中環德輔道中的萬宜大廈，歷史悠久，左丁山自鄉下出嚟，細細個就跟老竇去見識舊萬宜大廈嘅香港獨有嘅新科技──自動電梯，好細部，由德輔道中入口升上大道中水平啫，但當年係好巴閉，因左丁山一代嘅香港人，有不少都係在萬宜大廈認識乜嘢叫做電梯（escalator）嘅。
新萬宜大廈夠晒漂亮嘞，旁邊有一條萬宜里，貫通電車站與大馬路，但好少人行，原因係不知何年何日開始，萬宜里成為廢紙、紙皮盒，及一啲小型可循環再用嘅建築材料嘅集散地，每日有大量廢紙、廢物在此包紮，然後有阿婆阿公（近年多咗南亞裔大漢加入）將打紮好嘅廢物，從路上推往域多利皇后街中環街市旁邊，等待貨車收集、運走。
陶傑話香港七八十歲阿婆在馬路上推廢物木頭車，係香港一景，歐洲人遊客拍照留念。呢啲事，左丁山在中環見得多，並不以為係香港嘅黑暗一面。黑暗嘅係上星期四在灣仔莊士敦道下午，在喜萬年吃過燒豬午飯後，一路行去金鐘站搭地鐵，中途見到一個老男人坐在橫街馬路，露出傷痕滿佈，血淋淋嘅小腿，扮乞兒行乞，但佢似乎係剛剛開工噃，嫌啲血跡仲未夠多，用手向小腿猛咁抹上血色顏料，左丁山睇到，幾乎反胃。相形之下，肯付出勞力，晨早就在中環出動，推廢物木頭車之阿公阿婆，更值得尊重。
香港有綜援金派發，大部份係派發畀年老傷殘人士，推車阿婆與扮乞兒嘅男人照計一定有資格攞，唔駛在路上幹活。有冇人調查過，推車阿婆究竟有冇攞綜援呢？還是心甘情願靠自己雙手搵食呢？抑或係攞咗綜援又再出嚟賺外快呢？歐洲人在香港旅行，影阿婆相，不足為奇，畢竟係神秘亞洲風情之一，如要影乞兒，歐洲有大把，不必在香港攞景。香港特區政府如要再派糖，可以透過關愛基金用扶貧方式資助，邊度使用全民派錢方式呀。一個預算案，暴露出香港不少人有貪玩搗蛋意識，譬如話非DSE學生去參加DSE考試，玩殘財政司司長之類，基本上係反智行為，刁民言論，但亦可知年青人自佔中後，與政府好唔妥，鍾意搵藉口抵制政府，令政府麻煩也。連俞正聲都話要深做細做香港年青人工作，中央知道失去一代香港人了。