立法會噚日又有兩個小組出世，分別選出正副主席。第一個係「跟進免遣返聲請統一審核機制有關事宜小組」，一聽個名就知係處理假難民問題，小組有19位議員加入，民主派只得6個，冇派人出嚟爭做舵手，主席方面由民建聯葛珮帆大熱跑出。
八方反而估唔到，咁細嘅小組都要選副主席，而且新民黨容海恩自薦出任。恩恩豬解釋話平時做當值律師，處理過唔少免遣返聲稱嘅個案，累積唔少經驗，對小組工作有興趣，故此自薦做副主席。照八方理解，假難民問題最嚴重嘅地區並唔係新界東，偏偏兩位新東議員最關心，真係有趣。
另一個成立嘅小組就係有關公眾街市嘅，民主黨尹兆堅想做正或副主席，之但係點過到建制派嗰關？結果民建聯柯創盛同工聯會何啟明包攬正副主席。