曾自稱土生土長「香港仔」、留美多年嘅中大校長段崇智上任兩個幾月，噚日同傳媒茶敍時話今日嘅香港同佢細個時完全唔一樣，被問到點形容香港現時政治環境時就話：「我唔係搞政治，所以呢方面冇乜特別評語」。
中聯辦極力同教育界「行埋」，段崇智坦承喺春節聚會都同西環「傾過一次偈」，但只係問候同歡迎佢，強調大學應同社會不同持分者溝通，以後都會繼續。
中大起緊全新私家醫院「中大醫院」，段崇智話進展良好，預計2019年落成，2020年啟用，會係全港首間全面電子化嘅「智慧醫院」。中大醫院執行董事馮康就話構思中智慧醫院嘅病歷紀錄會全面無紙化，病人由預約、求診到醫病，都會用科技令過程更順暢。醫院約有600個床位，舊年已經同浸會醫院簽咗5年約，每年為中大醫院額外培訓20個登記護士。