要數香港知名女性，又點少得前政務司司長陳方安生（圖）？聽日就係3月8日國際婦女節，有機構請咗各界別女權支持者，分享性別平權議題，陳太細數自己當年加入港英政府時，男女原來同工不同酬，佢於是成立工會，爭取7年後，女性公務員終於可以同男性同工同酬，在場人士聽到都報以歡呼聲同掌聲。
籲女性爭高職
陳太話，當年好少女性可以加入政府，1960年代只有一個女AO，當由一個加到兩個時，政府更加要同傳媒大肆宣傳「突飛猛進」嘅改變。之但係70年代女性公務員仍然同男性同工不同酬、福利同學習機會都有差別，陳太就同多個女性高級公務員成立工會爭取同工同酬。佢又提到，末代港督彭定康當年打算由AO中揀人做布政司，當中有3男1女，佢就係其中一個，最後肥彭揀咗佢。綜合咁多年嘅經驗，陳太話男性喺職場上多數主動推銷自己，「good at bullshitting」，呼籲姊妹們主動爭取升高職，提高地位。