三屆世界衝浪冠軍米克芬寧周三就宣佈退役，呢位36歲嘅澳洲選手，最出名應該係兩年前被鯊魚襲擊呢幕，但好在奇蹟走出鬼門關，真係牙煙到爆。不過講到運動員遇險，又點少得十年前嘅呢一次。
效力NHL佛羅里達美洲豹嘅Richard Zednik，喺08年2月10日嘅一場常規賽，意外畀隊友冰鞋嘅刀片𠝹開咗頸動脈，搞到成地血，好在喺隊醫同救護員急救之下，最後都冇事。
另一單驚險嘅運動意外，就發生喺2009年F1賽事，已退役嘅巴西車手馬沙高速駕駛期間畀碎片擊中頭部，雖然有頭盔保護，但眼眉位嚴重受傷，仲即場昏迷；好在佢唞咗大半季之後可以重返賽車場。
啱啱結束嘅冬奧都發生咗嚴重意外，奧地利選手舒亞拿喺滑雪比賽入面，背部落地頸椎斷裂，不過最神奇就係佢之後仲可以起身繼續比賽。
至於另一單較大名嘅就係前西班牙金童費蘭度托利斯，呢位效力馬體會嘅前鋒喺17年嘅一場西甲，爭頂頭槌時頭部重傷，好在最後都冇事。