新民黨立法會議員容海恩盛傳同該黨政策總裁袁彌昌撻着，但兩人都冇正式承認過戀情，恩恩豬噚日搞傳媒茶聚，焦點當然離唔開戀情喇，被問到點睇緋聞男友袁彌昌，恩恩豬竟然話「冇感覺」，仲叫大家唔好再問，因為有師傅話會「見光死」喎。
之前有傳媒就特登幫恩恩豬算命，算到佢嘅戀情會「見光死」，搞到恩恩豬都怕怕，𠵱家對戀情三緘其口。恩恩自爆過去都有算命經驗，「八八卦卦跟朋友去」，當時係問學業，因為讀書唔叻，不過佢就唔多信，覺得好多時都係「捉心理」，順勢講落去。
新年流流好多人都會同另一半拜年兼「見家長」，恩恩豬話初一就去咗九龍塘拜年，但就只係帶「兩梳蕉」，問到有冇去男朋友屋企，佢就只係肯話去好多地方，無承認又無否認。正所謂不認不認還須認，恩恩豬都係大方承認啦。