炮竹一聲除舊歲，話咁快就新嘅一年，早幾日新界鄉議局搞團拜，主席劉業強嗰篇批評司法覆核丁權係挑釁原居民嘅演辭，有新界人聽得高興之餘，亦有感長江後浪推前浪。身為十八鄉鄉事委員會主席嘅梁福元就話，可能做埋呢屆佢都收山喇。
梁福元噚日同傳媒拜年，同佢位做緊元朗區議員嘅公子梁明堅Jason，介紹佢哋自家種植嘅有機農產品啦。原來呢排梁福元開始種菠蘿，又話香港適合種嘅都係台灣或者海南品種，當中台灣種好食啲。Jason仲爆料話，爸爸成日上網睇有關耕種嘅影片，一睇就睇成幾個鐘。
講講吓，梁福元就慨嘆自己都係時候退下火線，政治嘅嘢留番畀啲後生搞算喇，有時間專注番喺務農上面。八方問佢係咪真㗎？佢話係㗎，可能做埋呢一屆就唔做。咁個位係咪傳畀Jason呢？佢就形容Jason仲係一張白紙，有待磨練喎，但佢亦不時提醒Jason要低調、少言，唔知係咪想培訓Jason呢。