阿仙奴聽日就要出征溫布萊，喺英聯盃決賽對曼城，但佢哋周四喺歐霸盃32強次回合就爆冷主場1:2輸畀瑞超球隊奧斯達辛斯，好彩合計贏4:2晉級，領隊雲格就大鬧班波衰輕敵，收起咗話有病嘅奧斯爾等主力，而且唞足一星期嘅曼城仲有前鋒加比爾捷西斯復操，兵工廠真係要醒定啲！
16強抽籤遇AC米蘭
阿仙奴上個禮拜作客瑞典以三球大炒奧斯達辛斯，而今場雲格收起格列沙加、梅斯達菲等主力，因唔合資格冇得踢嘅新兵奧巴美揚就帶埋女友同仔女坐包廂，一齊輕輕鬆鬆睇波。不過實力高幾班嘅槍手，竟然俾奧斯達辛斯反客為主，喺22分鐘同23分鐘閃電入兩球，燃起咗反勝嘅希望。好彩槍手之後企番穩陣腳，47分鐘比利連右路沉底傳中，客隊後衞朗奴穆基比解圍失誤「踢空氣」，伏兵遠柱嘅哥拉辛拿斯控定後近門大腳抽入，為球隊追至輸1:2完場，足智彩12倍嘅客W照爆得出。噚晚歐霸16強已經抽籤，阿仙奴會對AC米蘭，兩回合分別會喺三月八號同15號踢。
堅尼寸韋舒亞過譽
雲格就鬧爆班球員過份自滿：「我哋上半場係遊緊魂，而且陷入咗麻煩！因為我哋太自滿同埋唔集中，球隊防守出現問題仲經常失控球權，當攞到波嗰時又唔識用。」而堅尼仲寸韋舒亞名大於實：「我成日諗，韋舒亞係最過譽嘅球員，佢哋晉到級係因為夠運！」好彩奧巴美揚等正選聽日會復出，希望槍手踢番好啲，幫雲格打破未嘗贏英聯盃嘅宿命。
而曼城禮拜一英足盃爆冷作客輸畀韋根出局，周中難得冇比賽可以回一回魂，射手阿古路亦都避過停賽危機，加上因傷缺陣咗差不多兩個月嘅加比爾捷西斯都傷癒復操，雖然未知踢唔踢得，不過對曼城嚟講點都係好消息。
禮拜四其他歐霸32強次回合，意甲一哥拿玻里仲係用半隊副選出擊，不過都可以作客2:0贏RB萊比錫，但首回合輸1:3，因作客入球唔及對手出局。至於AC米蘭、拉素、馬德里體育會等都贏波晉級，由前利物浦領隊羅渣士教嘅些路迪，作客吞由前曼城主帥文仙尼帶嘅辛尼特三蛋，合計輸1:3出局。