前日係公民黨主席梁家傑嘅六十大壽。喺今屆立法會已經退下火線、𠵱家樂得清閒嘅傑哥，今年就總共有3個生日蛋糕賀壽，唔只有普通蛋糕，仲有非常特別嘅壽司蛋糕。不過最令傑哥歡喜㖭，相信都係由楊岳橋AY聲音導航，慶賀傑哥「登六」嘅短片加LEGO（圖），將傑哥比喻成太空人，大讚傑哥為公民黨貢獻良多㖭。
AY今次為傑哥「登六」影片親身上陣，全程以搞鬼聲線導航，佢仲出賣自己隻手拍片，將傑哥比喻做太空人，話傑哥選擇從政就好似太空人一樣，唔單止「漫無目的蕩嚟蕩去」，更加搞埋一個「唔等使」嘅公民黨。
「地中海」公仔喻傑哥
好在兩年之前，傑哥就已經搵到太空穿梭機，更加喺前日成功「登六（登陸）」，返到地球搵番老婆Carol，終於可以過開開心心生活。搞鬼嘅AY仲揀咗個「地中海」髮型嘅LEGO公仔，跟住仲笑傑哥「好快就同佢（個LEGO公仔）一樣，哈哈哈」，AY又叫傑哥要學結他，先可以襯手持結他嘅LEGO公仔喎。
AY透露係知道傑哥就快登六，於是就諗咗條橋拍片慶祝，又買咗LEGO做賀禮。剛剛「登六」嘅傑哥同八方講，條片好過癮，未收過咁嘅禮物，所以都好驚喜，不過佢大爆原來LEGO實物未到手㗎，唔知AY幾時會請食生日飯再將大禮親手獻上呢？
李八方