小小超李澤楷旗下電盈與香港電訊，年年要員工自費（今年位位180蚊）參加公司春茗嘅消息一出，即刻成為中環熱話，李老闆終於聽到大家嘅聲音，公司噚日對內宣佈，李澤楷全數贊助今年周年聯歡晚會入場費。按舊年有近4,000名員工參加去計，總額約72萬，一百萬有找，對小小超真係碎銀喇。
據電盈與香港電訊員工所講，佢哋農曆新年開工一向冇開工利是，春茗亦要自費，小小超今年算係破例；畀咗錢嘅員工亦可以獲得退款。
有員工話，其實唔少同事已經畀咗錢，朝早聽聞老細改變主意，請全公司去春茗都唔係好相信，直到人事部下午通知大家，寫明「同事如已支付費用，將會獲得退款」。真係覺得喜出望外，等於收到開工利是喇；呢次小小超真係順應民意。