社企全城街馬舊年舉辦「啤酒跑」，一邊跑一邊飲啤酒，俾衞生署同醫學團體炮轟，最終跪低取消派啤酒，但全城街馬未有氣餒，再接再厲，聽日以「食．玩跑」為主題，舉辦美食馬拉松，仲會推出一口鮑魚同埋一口牛柳粒。
不過衞生署冇打算放過全城街馬，今次就透過衞生署衞生防護中心fb專頁出po派「馬拉松小貼士」，講明跑手宜補充水份，進食如香蕉等食物，提升血糖，但就忌喺比賽前及途中，進食高脂肪及蛋白質，因難消化，令能量去晒個胃度，減少供應畀肌肉嘅能量，影響運動表現，仲話明︰「講到明邊跑邊食牛肉粒、鮑魚、叉燒飯、魚旦……？！咪玩啦！」帖文又話「要跑馬拉松，就要認真跑！」嘩，擺到明直線抽擊喎，係咪暗寸個馬拉松搞得唔認真先？