早排港交所交易大堂改裝後重開，入面嘅香港金融博物館幅以「貝」字為主題嘅漢字牆，出現咗「貪」、「賊」、「賄」、「賂」等一大堆負面意思嘅字，仲要係新年流流開幕，唔怪得唔少人睇見都話大吉利事，不過呢單嘢就成為好多人拎嚟抽水嘅題材，好似二少田北辰咁，佢就係fb貼咗張「田」字牆嘅相（圖），不過入面揀嘅字就梗係有水平好多了。
二少個po用「超準？！第一眼見到的字就是你2018年運程走向？」做題，話新正頭梗係揀番啲好意頭嘅字祝福市民，所以佢就揀有「田」嘅字，仲叫大家睇睇第一眼睇到邊個字，而二少就揀咗「福」字送畀市民，又祝市民新一年福星高照，福祿滿門，福如東海，福壽齊天，五福臨門，所以新年流流揀漢字，要學二少咁先係㗎！