明日大年初三（18日），除咗去拜年有乜做好，與親戚見面多數以賭字行先，不如入去沙田馬場行個大運，玩番兩手，睇吓自己今年運程同個旺字有冇緣份都好。
到時還有秋官及汪阿姐出席賽前表演節目，唔知會否合唱「華麗轉身」呢首經典名曲呢？
其實當日三T估計一注獨中有1800萬，想獨佔呢袋大錢，少不免總要啲運幫幫手，馬會有提供大年初三行運貼士。雖然玄學唔係科學，但都有少少參考價值。
馬仔嘅綵衣由唔同嘅顏色同圖案組成，而大年初三有利嘅顏色有紅及綠；再加有利圖案為三角形、間條。
馬迷可一試喺當日百幾匹參戰馬中，揀返類似嘅配搭嘅綵衣，或者會有啲斬獲。另外，大利有以下三個號碼，為2、6、9，諗唔到三T拖咩腳好，都可以優先考慮。
正所謂一日之計在於晨，出門口向邊行同幾時出，都係行運嘅重中之中，而吉時就有巳時（上午9時至11時）、午時（上午11時至下午1時）及未時（下午1時至3時），而有利方位就正東方。
當日開場時間中午係12點半，午時向東出門就最正路啦！《蘋果》重申多次玄學只係一個參考，最後祝大家新春快樂、橫財就手！