32歲日本男星山下智久日前被爆新戀情，更被雜誌《女性Seven》圖文並茂孖索模新歡Niki同遊夏威夷，報道指兩人上月結伴在當地旅行玩足一星期，估計山下智久已跟石原聰美分手收場。
原名丹羽仁希嘅Niki年僅21歲，年前演出愛情真人騷節目《Terrace House》得以上位，佢曾與男拍檔佐藤魁在節目中發展，但結果都係無疾而終。有指山下智久返日曾到訪石原聰美香閨，繼而令外界一度懷疑佢一腳踏兩船。近日就有消息指，山下智久同《朝5晚9》拍檔石原聰美的確已成過去式，知情人士指男方到石原聰美係取回自己物品，同舊愛正式劃上句號，而趕拍新劇《UNNATURAL》嘅石原聰美在片場表現得情緒高漲，貌似未受失戀影響心情。
自從戀情曝光，Niki一直未有更新Ig，連日來仍有大量惡意留言，直指Niki借山下搏上位，又有人在其Ig上指石原聰美比Niki可愛得多。其實Niki最近呢個po，見佢穿上淺藍色大褸，並留言話喜愛藍色大褸（coat），巧合地「藍色褸」同山下代表作《Code Blue》日文發音相近，因而刺激一班山下粉絲神經。