啟民創社成立嘅「社創設計室」，收集逾200個設計學生同長者共創嘅意念，以「死物習作」為題，通過跨代討論，設計出以紙摺嘅花園葬撒灰器「信別」，令死後仍然可以有詩意。
雙手撒如擁抱
啟民創社創辦人李欣琪透露喺跨代創作過程中，發現大部份人關心同感興趣嘅係花園葬，即係將先人火葬後嘅骨灰灑到花園，佢哋帶學生到花園葬現場考察，發現傳統花園葬嘅撒灰器設計上有可以改進的地方，如風大時撒灰者或會「食晒」啲灰，撒灰器亦太機械化，難以將情感表達，「有老人家提出（撒灰過程）可唔可以慢啲？可唔可以詩意啲？又有人要求用雙手撒，喺最後嘅時間被家人擁抱」。
結果成員經過多次創作，設計出用紙摺成嘅撒灰器信別，等家人可以先喺撒灰器寫上祝願，以雙手撒灰後再將信別放於化寶爐火化，以輕煙送別先人最後一程，此舉免除共用撒灰器，亦讓撒灰過程完整同有詩意。
啟民創社希望信別未來可以應用到食環署的花園葬儀式，同時會改善其他設計，探討撒灰嘅其他可能。