天文台成立135周年，位於觀塘翠屏道嘅香港歷史檔案大樓舉辦「百年風雲：檔案裏的天文台故事」展覽，展出140份1890年至1980年代嘅珍貴氣象紀錄，市民可以透過相片、文件、設計圖同廣告書等，多角度了解天文台90年來嘅發展。八方噚日參加傳媒導賞，發現珍品確實好多，包括日佔時期天文台台長伊雲斯被關押喺赤柱集中營時記錄氣象資料嘅煙包等等。
台長岑智明話，天文台成立初期，只得台長同助理兩個人，發展百多年先變成有300幾人嘅政府部門。佢分享話，日佔時期天文台台長伊雲斯俾日軍羈押喺集中營嗰陣，即使缺乏資源，仍然用煙包紙為當時嘅氣象留低紀錄，呢段故事真係令佢好感動。展期會至今年12月31日，市民可以免費參觀。