選舉主任鄧如欣自從取消咗周庭參選資格，一直俾人鬧爆，不過鄧主任平時份人原來好大官威㗎，應該都無有怕。點解咁講？事關八方發現鄧如欣喺2012年出任政制及內地事務局首席助理秘書長嗰陣，試過屋企發生電力故障停電。鄧主任於是用局方部傳真機向中電投訴，每頁紙都印晒「政制事務」字眼，仲將同一封信抄送畀機電署、警務處、消防處部門首長，連唔關事嘅環境局局長都收到，驚死中電唔知佢係「高官」喎。
林卓廷︰用官職施壓 公器私用
八方睇過封投訴信，信件長4頁，發出日期係2012年8月下午4點57分辦公時間，上款寫畀中電多個部門主管、同埋屋苑管理公司啟勝，內容大致講鄧如欣個屯門單位突然停電，電箱傳出強烈氣味，佢同鄰居商討後決定報警，最後發現事故由中電有問題電纜引起，而且拖延數日都仲未有番電，於是要求中電同啟勝全面檢查單位電力設施，喺單位重鋪電線期間安排住所同損壞，重要解釋事件成因同交代有咩措施防止同類事件發生。
而封信除咗每一頁都印有「CONSTITUTIONAL AFFAIRS」（政制事務）的字眼，仲印埋政制及內地事務局喺政府總部嘅傳真號碼，仲有鄧如欣個辦公室電話，咁搞法，係人都知佢係政府官員啦。立法會議員林卓廷就批評鄧如欣公器私用，質疑佢想用官職向中電施壓。
呢單個案，其實舊年已經有人睇唔過眼，轉介咗畀公務員事務局投訴，局方當時都有向鄧如欣了解，點知鄧主任話件事過咗5年，唔記得自己有冇無做過喎。八方噚日向公務員事務局查詢，局方就拒絕評論個別個案；八方於是再打畀鄧如欣了解，鄧主任就話公務員事務局已經答咗，佢冇補充喇。
李八方