英超車路士近期戰績認真一般，上輪聯賽更喺主場慘吞般尼茅夫三蛋，有指領隊干地已萌生去意，仲想重返意大利國家隊。新任意大利足球總會主席法比仙尼爆料，話干地好有興趣再次執掌意大利國家隊，如果干地最終離隊，有傳前巴塞教頭安歷基會接掌佢嘅空缺，成為藍戰士總舵手！另外，車路士新兵基奧特周四已經出席球會操練，但卻一臉憂愁似乎心情麻麻，同其他隊友亦冇咩交流。